H84 - Jólafrímerki 2009 - Sjálflímandi

Bessastaða er fyrst getið í Íslendingasögu Sturlu Þórðarsonar. Jörðin var þá í eigu Snorra Sturlusonar. Að honum látnum sló Noregskonungur eign sinni á staðinn, sem varð fyrsta jörðin á Íslandi í konungseign. Þar varð brátt höfuðsetur æðstu valdamanna konungs hér á landi og var svo til loka 18. aldar. Kirkjur hafa staðið á Bessastöðum síðan árið 1000. Núverandi kirkja var vígð 1796. Hún er meðal elstu steinbygginga landsins. Steint gler var sett í glugga kirkjunnar árið 1956 í tilefni sextugsafmælis Ásgeirs Ásgeirssonar, annars forseta lýðveldisins. Gluggarnir eru 8 talsins og listamennirnir voru Finnur Jónsson og Guðmundur Einarsson frá Miðdal. Steindu listaverkin rekja trúarsögu Íslendinga allt frá komu papa. Myndefni frímerkjanna er „Heilög Guðsmóðir“ eftir Finn Jónsson.