681B - Ferðamannafrímerki VIII - Norðurljósaferðir - 50g utan Evrópu

Köfunarferðir hafa notið aukinna vinsælda meðal ferðamanna á Íslandi á undanförnum árum. Innan þjóðgarðsins á Þingvöllum er eingöngu leyfð köfun í tveimur gjám, Silfru og Davíðsgjá. Silfra er einn besti köfunarstaður á Íslandi og um 7.000 manns kafa þar ár hvert. Austar í þjóðgarðinum er Davíðsgjá. Kafarar verða að uppfylla reglur og skilyrði um búnað og réttindi til köfunar. Þeir verða jafnframt að hlíta öllum reglum um köfun og virða reglur um umgengni innan þjóðgarðsins. Ekki er leyft að kafa einsamall, stunda hellaköfun eða fara dýpra en 18 metra. Kafarar kafa alfarið á eigin ábyrgð og áhættu. 

Norðurljósaferðir. Norðurljósin eru stórfenglegt náttúrufyrirbrigði og erlendir ferðamenn sækja sífellt meira í ferðir til að skoða þetta heillandi listaverk náttúrunnar. Ríflega 27% erlendra ferðamanna sem heimsækja Ísland fara í norðurljósaferðir en hlutfallið var 14% fyrir tíu árum. Ekki er alltaf hægt að ganga að norðurljósunum vísum. Þegar ferðamenn koma til Íslands eru þeir strax komnir á norðurljósaskoðunarsvæði á Suðurnesjum og höfuðborgarsvæðinu. Mögnuð norðurljós má stundum sjá frá miðbæ Reykjavíkur en allra best er að fara út fyrir höfuðborgarsvæðið þar sem ljósmengun er lítil sem engin til að njóta þessa náttúrufyrirbæris.