667A - Ísland á HM í fótbolta í Rússlandi 2018 - Sjálflímandi - 50g innanlands

Ísland vann eitt sitt allra stærsta íþróttaafrek í sögu þjóðarinnar þann 9. október 2017 þegar karlalandsliðið í fótbolta tryggði sér þátttökurétt í lokakeppni HM, sem fer fram í Rússlandi sumarið 2018. Ísland tryggði sér sæti í lokakeppninni fyrsta sinni, með því að sigra Kósóvó 2:0 á Laugardalsvellinum og þar með sinn riðil í undankeppni HM. Segja má að draumur heillar þjóðar hafi ræst þegar „strákarnir okkar“ tryggðu sér sæti í úrslitakeppni HM 2018. Um leið verður Ísland með sína 346.000 íbúa fámennasta þjóð sögunnar sem tekur þátt í þessu stærsta móti knattspyrnunnar. HM í Rússlandi hefst 14. júní og lýkur með úrslitaleiknum 15. júlí á Luzhniki vellinum í Moskvu. Keppnisliðin á HM í Rússlandi verða 32 talsins og verður leikið í átta fjögurra liða riðlum. Alls verða 64 leikir spilaðir á 12 stöðum í 11 borgum. Þrír til fjórir leikir verða á dag á meðan riðlakeppnin stendur yfir. Breska blaðið The Guardian hefur birt styrkleikalista þar sem raðað er niður liðunum sem fara á HM. Ísland er í tólfta sæti á þessum lista, fyrir ofan stórþjóðir eins og England og Kólumbíu. Það sem helst gerir þetta frímerki ólíkt öðrum er að allt landsliðið tók þátt í teiknun þess meðan á æfingabúðum í Katar við Persaflóa stóð. Þetta var frekar óvenjulegt landsliðsverkefni þar sem hver leikmaður úr landssliðshópnum teiknaði eftir fyrirfram hannaðri mynd á gegnsæjan pappír. Hönnuðurinn skannaði síðan allar teikningarnar og setti saman í eina myndskreytingu sem prýðir frímerkið og ber vitni um steka liðsheild íslenska landsliðsins í fótbolta. Ekki er vitað til að landslið í fótbolta hafi áður myndskreytt frímerki.