661FDCS - Evrópufrímerki 2018 - Brýr

Hjóla- og göngubrýr yfir Elliðaárósa.
Í september 2013 voru opnaðar tvær nýjar brýr yfir Elliðaárósa. Stígarnir sem þeim tengjast eru liður í stærra kerfi á höfuðborgarsvæðinu og komust strax í mikla notkun. Brýrnar og stígarnir yfir Elliðaárósa eru samvinnuverkefni Reykjavíkurborgar og Vegagerðarinnar. Brýrnar eru 4,5 m breiðar, þær eru 36 m langar og burðarvirki þeirra er 18 m hátt. Með þessum brúm renna upp breyttir tímar með aukinni áherslu á fjölbreytta samgöngumáta eins og hjólreiðar og almenningssamgöngur.

Hengibrú yfir Jökulsá á Breiðamerkursandi.
Í Austur-Skaftafellssýslu er ein stysta jökulá landsins, aðeins um 500 metra löng. Fyrr var hún talin ein erfiðasta jökulá á Íslandi vegna þess hve oft hún breytti farvegi sínum. Hún rennur úr Jökulsárlóni við jaðar Vatnajökuls á miðjum Breiðamerkursandi. Hengibrú er ein gerð brúar, þar sem brúargólfið eða brautin, hangir í burðarköplum sem festir eru í akkeri við báða enda. Brúargerðin á Breiðamerkursandi hófst 1966 og tók alls níu mánuði. Brúin var vígð í september 1967. Hún var með stærstu brúarmannvirkjum hér á landi, 110 metra löng milli turna.