642FDC4 - Iðnaðarmannafélagið í Reykjavík 150 ára

Til þess að efla hag íslenskra iðnaðarmanna um miðja nítjándu öld þurfti samtök og menntun. Stuðlað var að þessari þróun með stofnun Iðnaðarmannafélagsins í Reykjavík 3. febrúar árið 1867. Stofnendur voru 31 talsins, allir reykvískir iðnaðarmenn. Tilgangur IMFR var frá upphafi að efla menntun iðnaðarmanna og styrkja stofnanir sem starfa í þeirra þágu. Saga Iðnaðarmannafélagsins er samofin sögu Reykjavíkur. Árið 1869 stofnaði Iðnaðarmannafélagið í Reykjavík kvöldskóla. Rekstur skólans reyndist félaginu fjárhagslega erfiður og lagðist kennsla niður árið 1890. Á fundi í Iðnaðarmannafélaginu í mars árið 1901 kynnti stjórn félagsins áform um að koma á fót kvöldskóla fyrir iðnaðarmenn. Skólahald með nýju fyrirkomulagi hófst við Iðnskólann í Reykjavík 1. október árið 1904. Árið 1924 gaf Iðnaðarmannafélagið í Reykjavík íslensku þjóðinni styttuna af Ingólfi Arnarsyni sem stendur á Arnarhóli, og á aldarafmæli sínu árið 1967 gaf Iðnaðarmannafélagið í Reykjavík borgarstjóraembættinu „hátíðartákn“, keðju sem borgarstjóri ber við hátíðleg tækifæri. Félagar í Iðnaðarmannafélaginu eru um 290 talsins. Félagið styrkir allt menningarog menntastarf sem unnið er í þágu íslensks iðnaðar.