620A - Íslenski fáninn 100 ára

Hannes Hafstein Íslandsráðherra stofnaði Fánanefndina svonefndu í desember 1913. Nefndinni var falið að koma með tillögur um gerð íslenska fánans, lögun hans og lit. Þann 1. júlí 1914 skilaði hún tveimur tillögum um liti fánans. Önnur gerði ráð fyrir að fáninn yrði þrílitur, heiðblár með hvítum krossi og rauðum krossi inni í þeim hvíta. Í seinni tillögunni var gert ráð fyrir heiðbláum krossi og hvítri og blárri rönd utan með beggja vegna. Að beiðni fánanefndar leitaði ráðherra álits Danakonungs á löggildingu bláhvíta fánans. Konungur hafnaði hugmyndinni, kvað fánann líkjast um of gríska fánanum. Vegna andstöðu konungs hætti Fánanefndin við að gera tillögu um Hvítbláann, eins og þessi fáni var nefndur. Þann 19. júní 1915 gaf Danakonungur út úrskurð um þrílitan þjóðfána og staðfesti nýja stjórnarskrá þar sem kveðið var á um að Ísland yrði frjálst og fullvalda ríki í konungssambandi við Danmörku. Þegar sambandslögin gengu í gildi 1. desember 1918 var klofinn fáni dreginn að hún á fánastöng Stjórnarráðshússins. Ungmennafélag Íslands gerði síðar upprunalega hvítbláann, sem naut vinsælda um aldamótin 1900, að sínum fána