597A - Eimskipafélag Íslands 100 ára

Eimskipafélag Íslands 100 ára

Eimskipafélag Íslands var stofnað 17. janúar árið 1914 og er með elstu starfandi fyrirtækjum á Íslandi. Saga félagsins tengist með margvíslegum hætti sögu íslensku þjóðarinnar á tuttugustu öld. Ein meginforsenda efnahags- og stjórnmálalegs sjálfstæðis þjóðarinnar var að Íslendingar tækju samgöngur og flutninga til og frá landinu í eigin hendur. Félagið sem strax í upphafi fékk heitið „óskabarn þjóðarinnar" átti ríkan þátt í að auka hagsæld í landinu. Félagið hóf reglulegar siglingar árið 1915 með skipinu Gullfossi. Sú þýðing sem félagið hafði fyrir Íslendinga sannaðist í báðum heimsstyrjöldunum þegar erlend skipafélög hættu að sigla til landsins. Eimskip rekur í dag áreiðanlegt og skilvirkt siglingakerfi á Norður- Atlantshafssvæðinu með skrifstofur í 19 löndum en býður jafnframt upp á alhliða flutningaþjónustu um allan heim.