548B - Selir II - Útselur

Útselur er önnur tveggja selategunda sem kæpa við Ísland – hin tegundin er landselur. Útselir eru allt að helmingi stærri en landselir. Fullorðinn brimill getur náð yfir þriggja metra lengd og orðið 300 kg. Urturnar eru gráar að lit með dökkum flekkjum að ofan en brimlarnir eru næstum einlitir dökkir. Bæði augu og eyru sitja hátt á höfðinu og selurinn getur því horft í kringum sig án þess að reisa höfuðið hátt upp úr sjónum.